قصة شاب مواطن مع 3 بنات ..

عدد المساهمات : 17 تاريخ التسجيل : 21/10/2009

قصة شاب مواطن مع 3 بنات ..
قصه متوقعه ..
تحدث في أي وقت وأي مكان ومن غير سابق إنذار ..
إنسان عادي مثل باقي الناس اسمه مبارك ..
صاحبنا مبارك في يوم من الأيام اختربت سيارته وماكان قدامه إلى انه يستخدم سيارة التاكسي إللي راعيه مسافر و مبارك هو كفيله ..
يعني عشان يقضي مشاوير ويخلص أشغاله ولا يتعطل ..
في الطرف الثاني كانت هناك بنت آيه في الجمال ..
أسمها نوره ..
كانت نوره معزومه على عرس صديقتها فراحت هي وأختها مريم..
وبنت خالتهم منى ..
ركبوا السيارة مع السائق وهم في نص الطريق اختربت سيارتهم وقفوا في الشارع
والسائق يحاول يتفلسف ويصلح السيارة ولكن مافي فايدة لازم تروح عند الميكانيكي ..
وفي نفس الوقت صاحبنا مبارك كان نازل البنك يسحب من ماكينة السحب الآلي
وكانت سيارته التاكسي إلا بالثلاث بنات يفتحون باب التاكسي ويركبون ..
مريم : رفيق سير قاعة الأعراس الفلانيه .
مبارك ..!!
مستغرب وحاير ويكلم نفسه شو اسوي شو هالورطه ..؟؟
والله فشله صرنا رفيق بعد ..؟؟
يالله مشي .. تقول مريم ..
مبارك : زين ماما .
مريم : وهي محرجه أنا مب أمك .
نوره : اسكتي ذولا الهنود كذا كلامهم .
المهم مبارك وداهم المكان المطلوب وهو طول الوقت عايش بجو غريب يتخيل نفسه
لو كان سائق تاكسي ويقول الله يعينكم يالهنود ..
مبارك ..
وصلهم المكان المطلوب وقبل نزولهم من التاكسي أعطوه عشرة دراهم ..
صاحبنا خذ العشرة وهو مسكين مو عارف وش يسوي لازم يأخذ الفلوس حاله مثل باقي التكاسي وهم نازلين ..
منى : رفيق جيب الباقي .
مبارك : وهو في حالة ارتباك .. كم يبغي ماما ..؟؟
منى : هات خمسه شو أول مره أتوصل ناس ..؟؟
نوره : منى انزين اشوي اشوي على الرجال .
نزلوا البنات اشوي بعيد عن القاعة عشان محد يشوفهم نازلين من تاكسي .
وراح صاحبنا وهو يضحك من الموقف ويقول منو يصدق هالسالفه ..؟؟
في القاعة بعد ما قعدو في أحد الطاولات .
نوره: منى وين موبايلي .
منى : مب عندي .
نوره: مريم موبايلي عندك .
مريم : لا يمكن نسيتيه في البيت .
نوره : لا كان عندي في التاكسي .
منى : أجل طاح منكي في التاكسي .
نوره : مريم ، منى ..
حد فيكم يتصل على موبايلي يمكن يرد عليكم راعي التاكسي .
اتصلت مريم كم مره محد رد وجربت منى بعد محد رد .
مبارك في التاكسي وما يدري انه شي موبايل على الكرسي و كان على الهزاز .
مبارك راح المصبغة يجيب ملابسه ولما وصل المصبغه..
الهندي كان يحط الملابس في الكرسي اللي ورا ، وشاف الموبايل يهتز وينور ..
قال لصاحبنا طبعاً .. بابا فيه أنته موبايل كلام نفر ..
صاحبنا شل الموبايل قال أكيد هذا مال حد من البنات اللي ركبو وياي
أنا ناقص طول لسانهم ..؟؟
شاف الموبايل مفول من المس كول ، قال لزم بيتصلون أيدورونه
حط الموبايل على حضنه وهو يسوق ، وبعد اشوي اهتز الموبايل ..
مبارك : الوووو
مريم : الوو رفيق وين انته جيب موبايل مال انا .
مبارك : ماما أنامعلوم أنتي ..

أنتي حرمه مال شاديه ..!!
مريم : مالت عليك..
هيه مال شاديه. تعال عقب ساعة وجيب موبايل وودنا البيت بعد ..
مبارك : زين ماما واحد ساعة بعد.
مريم : أنا مب أمك .. يالله لا تنسى .
مبارك : يكلم نفسه شو هاالورطه اللي أنا فيها ..
أنا أهلي مايبهم من الأعراس وصدعت الأعراس أنحكم علي اجيب بنات الناس وأتهزأ ..؟؟
بعد ساعة سار مبارك نفس المكان وجو البنات الثلاث كان يدق لهم هرن (بوري )
وهو منزل راسه عشان محد ينتبه حق ملامحه ، وركبو التاكسي .
منى : فضحتنا أدقق هرنات (بواري )..
كل العالم شافونا ونحن نركب الروزرايز مالك ..؟؟
مريم : شفتوا العروس ؟؟
وايد أحلا من المعرس ..
هو شكله اقصر منها .
نوره : يالله الله يوفقهم مادام يحبون بعض بيعيشون :مرتاحين.
منى: شو هالاكل..
لاعت كبدي..
مادري من وين مسوينه .
بنمر مطعم ناكل شي أنا جوعانه .
مريم : هيه والله حتى أنا .
نوره : بس بناخذ سندويجات بسرعة عشان مانتأخر ورانا محاضره..
أمي بتهزئنا على التأخير.
مريم : عجل بنسير هوت برغر على طريقنا.
منى : رفيق سير هوت برغر.
مبارك : زين ماما
مريم : منى. هذا ولد منو؟؟
ولدي ولا ولدك؟؟
منى : ولد أي حد يركب وياه .
مبارك وهو يكلم نفسه :
اطنزوا ترا هندي استويت . لازم اتحمل .
وصلوا الجماعة الهوت برغر وكل وحده طلبت اللي تباه
مبارك : رفيق .. يبغي ياكل شي؟؟
مبارك : لا ماما أنا الحين سوي أكل.
مريم: هذا مال همبورغر..
هذا مال كيما وبراتا .
المهم الجماعة خذو طلباتهم وراحو البيت
وهم في الطريق البيت رن موبايل مبارك ،
مبارك شاف التليفون مكتوب البيت قال في نفسه هاي الوالدة
"اتصلتي في وقتك يمه"
مبارك : الووووووووو
أم مبارك : وينك
والبنات طبعاً في التاكسي ويسمعون الحوار اللي بيدور
مبارك : والله شو اقولج يمه
أم مبارك : خير أبويه شو بلاك ..؟؟
وقال السالفة حق أمه بالتفصيل وباللهجة المحلية
البنات من سمعوا الرمسه (السالفه )اتغشوا وسكتوا وتموا مثل الأصنام ولا همس !!!
المهم نزلهم وهم نازلين ..
مبارك : هاي الخمس دراهم مالكم أنا مب راعي تاكسي خذوها
نزلوا البنات وهم في حالة اندهاش !!؟؟
دخلوا البيت وراحوا الغرفه وكل وحده اتشوف الثانية ومب عارفة شو اتقول ..
مبارك : معقولة اللي صار
منى : اسكتو عني أنا روحي متفشله لين الحين
مريم : أنا شو أقول.. أنا اكثر وحده هزأته ..
نوره : بصوت عالي الحقو ..
نسيت موبايلي مرة ثانيه في التاكسي ..
مريم: شوووووووووووو ؟؟
منى : مب وقت النكت الحين
نوره : صدق والله.
يوم طلعت الفلوس حق المطعم طلعت الموبايل من الشنطه كان أنساه على الكرسي
شو الحل ؟
مريم : أنا لو تموتون مابتصل مالي ويه
منى: نوره لا تطالعيني .. أنا صح ويهي لوح ..
بس هذا مواطن لا تقوليلي اتصلي ..
تمت نوره حايره..
شو أسوى اتصل شو أقول ؟؟
مبارك روح البيت ولما وصل كانو طالبين منه أغراض يجيبها من السوبر ماركت
وهو ينزل الأغراض ، شاف الموبايل طايح على المرتبه مال التاكسي ..
قال : معقولة!!؟؟ شو هالحاله ؟؟
المهم صاحبنا شل الموبايل وياه وراح حجرته وحط الموبايل عند موبايله
وتم طايح على السرير لين ماغفل ..
نوره في البيت وتفكر في حل وبعد تفكير جلست تقنع نفسها شو يعني
أنا بتصل وبقوله ابغي موبايلي مافيها شي ،بس الحين الساعة ثلاث في اليل عادي
هذا أكيد واعي وبعدين أنا بتصل على تليفوني .
المهم اتصلت نوره .
مبارك وهو راقد : الوووووو
نوره : الووووووووووو
مبارك راقد ولا يدري شو مستوي وناسي الموضوع ويتحسب المكالمة على موبايله .
مبارك : منو أنتي؟
نوره: أنا صاحبة الموبايل
مبارك : أنتي فاضيه متصلة على موبايلي وتتمصخرين وبند الموبايل في ويها
(يعني سكر الجوال بوجهها)..
نوره : أتكلم نفسها هذا راقد صدق ولا يتمصخر.
صاحبنا قام من الرقاد الساعة ثمان ،وهو يسبح قال أنا جني كلمت حد في اليل ؟
ليكون البنت !! المهم طلع من الحمام وشيك على الرقم والوقت .
مبارك وهو يكلم نفسه : أنا شو خبصت؟؟
المهم تم صاحبنا حاير شو يسوي قام واتصل على الرقم اللي اتصلت منه
البنت لكن طلعله المسج المشؤوم .
(ليس لديك الرصيد الكافي).
مبارك: تليفون البنت مافية رصيد كيف اتصل من تليفوني مب حلوه
راح واشترى بطاقة من الدكان ، ودخل الرصيد..
وبالغلط اتصل على تليفونه من موبايل البنت ، جان إيرن بنده..
وقال أنا غبي وين متصل ؟؟
المهم بعد فتره رن تليفون نوره اللي عند مبارك .
شذى : الوووووووو نوره
مبارك : الووووووووووو
شذى : منو انته؟؟
مبارك: ماما أنا نفر مال تاكسي..
هذا حرمه يخلي تليفون داخل السيارة.
شذى : انزين رفيق انته مايبند التليفون الحين أنا يخلي نفر مال تليفون يسوي تليفون .
مبارك: زين ماما والمسكين من كثر مامثل دور الهندي قام يرمس ويهز راسه .
شذى : الووووو مريوم وين اختج نوره
مريم : ويه راسج الناس ايسلمون قبل ..لحظه
نوره : الوووووو ها شذوه بلاج؟
شذى : حصلت تليفونج.
نوره وهيه مستغربه : تلفوني ؟
وين؟
وكيف وصل عندج؟
شذى : مب عندي ، اتصلت فيج ورد علي الهندي راعي التاكسي .
نوره : خلاص الحين بشوفه يالله باي.
نوره : الوووووووووو
مبارك : نعم
نوره : اخويه .. أنا صاحبة التليفون.
مبارك : هلا أختي .. اسف يوم اتصلتي أنا كنت راقد ..
نوره : حصل خير كيف اقدر اخذ التليفون؟
مبارك : مب مشكله انا بيبه البيت
نوره: لاااااااااا بتسببلي إحراج ونته عارف ليش
مبارك : على راحتج وين تبيني ايبه
نوره : اتعرف المركز ألفلاني
مبارك : هيه
نوره : إذا مافي تعب عليك..
وده الأستار بوكس..
وعطه اللي على الكونتر..
وقوله وحده بتي تأخذه.. وأنا الحين بتصل فيهم.
مبارك : إنشاء الله
نوره : شكرآ اخويه وأنا أسفه على الإزعاج.
مبارك : افااا عليج أنا اللي لازم اتأسف.
نوره : على العموم يالله مع السلامة.
مبارك : في أمان الله.
وصاحبنا مبارك راح وودى التليفون المكان المتفق عليه وراح أيقضي مشاويره
وحصة راحت وخذت موبايلها .
مبارك دش البيت وخلى موبايله في السياره ، وخذ دوش وطلع .
ركب السيارة وحصل خمسة مس كول شاف منو متصل..
مرتين فيصل ، ومره محمد ، ومره علي ، بس الرقم الخامس غريب..
نسى انه اتصل على تليفونه من تليفون نوره بالغلط ..
مبارك : شو هالرقم الغريب!!
منو متصللي..
رقمي يديد من يومين مطلعنه.
ومحد يعرفه إلا كم واحد وأنا مخزن ارقامهم ،خلني أشوف منو هذا
مبارك : الو
نوره: الو
مبارك : عفوآ أختي منو متصلي على الموبايل
نوره: محد اتصلك اتأكد من الرقم
مبارك : مب الرقم .........
نوره: صح.. بس أنا ماتصلت على هالرقم واصلاً أنا كنت ناسيه تلفوني في التاكسي .
مبارك : اسف أختي أنا راعي التاكسي بس مادري يمكن بالغلط اسمحيلي
نوره: حصل خير
وكل منهم سكر التليفون وسرح اشوي..
معقولة اللي قاعد أيصير؟ معقولة هالصدف .؟؟
نوره : وهي يالسه تذكر كل اللي صار وشاله الموبايل في ايدها ومن غير
ما تشعر جان أتخزن الرقم وكتبت مكان الرقم (راعي التاكسي) ..
ومبارك خزن الرقم بس ماكان قصده يتصل أو أي شي بس للذكرى
وكتب عند الاسم (الصدفة) ..
ومرت الأيام والأشهر على هالموضوع وكل منهم كان بين فتره والثانيه يذكر
القصة ويسرح لكن بدون ما يكون في باله شي غير الاحتفاظ بالذكرى الحلوة .
وبعد ست اشهر .
كان مبارك يتمشى في مركز تجاري ويا واحد من الربع اسمه فيصل
فيصل : ابغي اشتري عطور .
مبارك: هذا وقت عطور.. انته محد يسير وياك.
فيصل : ذليتنا عاد دقايق بنشتري وبنطلع
مبارك: أنا ماعرف سوالفك؟ انته ما تشتري بسرعة.
فيصل : لا هاي المرة عارف شو ابغي
مبارك: يالله صداقتك طالعه عليه أغلا من بيع السوق
فيصل : مايسوى عليه هالعطر
مبارك : يالله طوف طوف ( يعني عجل عجل )
دخلو الشباب المحل وفيصل رد حق عادته وايدور وكل اشوي مبارك..
شو رأيك بهذا وهذا .
مبارك : ما يخصني.. دور اللي تبغيه روحك ..انته ماينسار وياك..
مبارك وهو يالس يجلب عينه في المحل والمحل كله مرايات وكان
ايشوف المحل عن طريق المرايات ، يت عينه على مستلزمات التجميل
والميك اب وفجأة شاف نوره !!
نفس الوقت نوره شافت مبارك!!
وهو شافها بس عن طريق المرايات من غير محد منهم يقدر أيحدد وين مكان الثاني
وكان الوقت أيمر بطريقه غريبه الثواني كانت أطول من الساعات وكل منهم مب قادر
ايشيل عينه عن عيون الثاني ..!!
وبعد لحضات التفت مبارك على نوره والتفتت هيه عليه وهاي المرة من غير مرايا ...
وشوي .. فيصل من غير مايلاحظ .. يالله نطلع أنا خلصت..
وطلع فيصل مع مبارك وكانت نوره طالعه في نفس اللحظة وطلعوا الثلاثة من الباب في نفس الوقت وكانت نوره على اليمين وبعدين مبارك وبعدين فيصل وهم عند الباب ومن غير قصد ضرب كتف مبارك في كتف نوره ، ونوره خذت اليمين من باب المحل ومبارك وفيصل من اليسار وتم مبارك ساكت أتغير180 درجه ، ونوره نفس الشي .
مبارك يكلم نفسه : معقولة هاي الصدفة ..؟؟
نوره: أتكلم نفسها هذا حلم اللي صار ولا واقع..؟؟
مبارك: شو اللي صار شو هالقدر اللي جمعني فيها
نوره : مب معقولة أنا موب امصدقة شو هالشعور اللي صابني مره وحده ..؟؟
مبارك: أنا شو اللي صار فيني معقولة ؟
كل واحد فيهم مانام في هاي الليلة .
مبارك قال لازم أكلمها بس كيف وبأي حق ، قصدي شريف بس أنا شو عرفني هاي البنت ..
يمكن مخطوبة أو مرتبطة وحتى لو لا، مب من حقي اتصل فيها ،بس شو أسوي
وأنا مب عارف أفكر انشل تفكيري ..
تذكر رقم تليفونها المخزن في تليفونه وقام وكتب مسج ،
(حسيتي بالي حسيت فيه)وطرش المسج ..
وكانت نوره سرحانة وما عطت المسج أهميه وهي تفتح المسج انتبهت مكتوب
المرسل (راعي التاكسي) ..
ومن غير ماتحس ومن الارتباك مسحت المسج ..
اتخبلت أنا شو سويت ؟؟!!
وصارت تلوم نفسها ..
شو أسوي؟
أتصل؟
شو أقول؟
أنا مب عارفة شو كان مكتوب في المسج..
شو اسوي؟
كيف أتصرف؟
وبعد تفكير طويل لقت حل للمشكله وكانت في حالة توتر وكتبت ..
(معك الاتصالات الرجاء إرسال المسج مره أخره للرقم الذي أرسلت له قبل قليل )
وصل المسج عند مبارك قال شو السالفة؟ بطرش مره ثانيه
(حسيتي بالي حسيت فيه)..؟؟
وصل المسج عند نوره وقرته .
نوره : شو أقول؟
وشو أرد؟
جلست تفكر وبعد اشوي
كتبت (إحساس غريب ما قدرت أفهمه) ..
مبارك تشجع واتصل
نوره : معقولة اتصل؟ شو اسوي؟ أرد؟ شو أقول؟ برد!!
مبارك : الووووو
نوره : ساكته
مبارك : الووووو
ما ترد.
مبارك : الظاهر أنا غير مرغوب فيني مع السلامة
نوره : لا لا لا لاتبند
مبارك : ممكن سؤال
نوره : ……… أتفضل
مبارك : أنتي مرتبطة بحد او محجوزة حق حد ..؟؟
نوره : ……… لا
مبارك : ممكن أتقدم لج
نوره : مستغربه وزادت دقات قلبها انته شو اتقول ..؟؟
مبارك : أنا قلت شي غلط ؟
نوره : لا بس انته ما تعرف عني شي وكيف ترضى تتزوج وحده كلمتك بالتليفون ؟
مبارك : ليش يعني شو صار لما كلمتيني في التلفون
نوره : ليش انته مب شاب مثل باقي الشباب اللي ما عنده استعداد يتزوج وحده كلمها بالتلفون!!
مبارك : ومنو قالج أنى إذا اتزوجت وحده ما كلمتها بالتلفون ما بتكون كلمت حد غيري قبل الزواج
نوره : بس لازم تتأكد من أخلاقي قبل
مبارك : وشو ألفايده الموضوع طلع من أيدي
نوره : عند منو الموضوع
مبارك : قلبي
نوره : انته شو اسمك
مبارك: مبارك
نوره : عاشت ألا سامي وانا
مبارك: لا تكملين نوره
نوره : كيف عرفت
مبارك : يوم اتصلت رفيقتج يوم كان موبايلج عندي قالت نوره
نوره : مبارك
مبارك : هلا
نوره : بتصدقني إذا قلت لك انك أول ريال غريب أكلمه
مبارك : نوره اتصدقين انج ريحتيني بكلمتج هذه
نوره : مبارك
مبارك : أعيوني!!
نوره : ممكن أتفكر اكثر وما تسرع ؟
مبارك: ممكن رقم بيتك عشان أهلي يتصلون ويحددون زيارة لأهلي.
نوره : يعني مصمم؟
مبارك: هيه ولا ما يشرفكم راعي تاكسي
نوره : محشوم انته ولد حلال بس ممكن اتكلمني عن وضعك
مبارك : أنا وحيد أمي وأبوي ، وأبوي متوفي وأنا عايش مع الوالدة موظف
وراتبي 9 آلاف، وعدنا فيلا صغيره عايشين فيها أنا وامي ،
عدنا ثلاث بيوت قديمه مأجرينهم ويدخلون حدود 4 آلاف في الشهر
وطبعاً مب مرتبط ..
نوره : كم عمرك ؟
مبارك: 27 سنه.
نوره: كانت لك علاقات من قبل؟
مبارك : أقص عليج إذا قلت لا بس الحين محد بحياتي من قبل لا اعرفج..
حتى رقم موبايلي مغيرنه محد يعرفه غير اشوي من ربعي ..
مبارك : بعد تبين تعرفين شي ؟
نوره : سلامتك
مبارك: ممكن الرقم

نوره : زين
واتصلو آهل مبارك بأهل نوره وصار النصيب وتزوجا في نفس الصالة اللي وصلهم فيها مبارك يوم كان
راعي التاكسي ..
وعقبال اللي مو متزوج ..
........
مختاره .. أتمنى تعجبكم ..
يالله ..
اخليكم بحفظ الله ..

تقبلـوـوـو تــحــيـاتــي

مشكور علي القصه

الف شكر على القصه

قصه جاااااااااااااااامده اهنيك على القصه

» بنات نرجع لذكريات زمان ؟؟‎